195楼. 【多圖】新是非精唔夠放 馮盈盈劉穎鏇後生靚樣搭救
2017年05月16日
無綫生活資訊節目《學是學非》日前開始播放第五輯,隨住張秀文、黃心穎、李佳芯退出,今季加入三位新嚟報到嘅「是非精」:馮盈盈(Crystal)、劉穎鏇(Tiffany)、張寶兒。三人都係應屆港姐,比起全部「三字頭」嘅元老級是非精:梁嘉琪、麥美恩(Mayanne)、湯洛雯年輕一大截,35歲嘅嘉琪更加比年紀最細、下星期滿20歲嘅Tiffany年長15年,早前舉行記招時,嘉琪更笑言自己生得出Tiffany,Tiffany於節目上更直呼Mayanne「姨姨」!
節目出街後,網民反應不一,有人話三位新人樣靚身材好,睇節目當睇女亦無妨;亦有人指佢哋玩得唔夠放,明顯同師姐唔夠Friend,火花不足。有心水清嘅網民指出,之前是非精每次換血都係逐個逐個咁加入,就連而家成為「台柱」嘅Mayanne,最初都曾經被狂插,今次一次過有3個新人,始終要啲時間摸索吓!